Dénombrement du fief de Colomby (1467)

(voir aussi le rapport de 1520 du même fief)

Cartulaire de Saint-Bertin, volume 7, page 532 (Bibliothèque de Saint-Omer).

Charte n°284, le 17 mars 1467 (1466 v.s.).

C’est le rapport et dénombrement que je Guillaume Beaurain fay et baille à très relligieuses personnes et mes très honnourés seigneurs messeigneurs les Relligieux Abbé et Couvent de l’église et abbaye de Saint-Bertin de mon fief de Colomby que je tiens et adveue à tenir de eulx, lequel mon fief s’estant et se comprent en certaines terres qui sont en ma main et en plusieurs hommes de fief qui tiennent de moy dont la déclaration s’ensieut aussi avant que purement bonnement je le puis faire ; c’est assavoir :

Premièrement en sept mesures de terre ou environ sus lequelle y a une motte avironné de fossés séans au pays de Langle en le paroisse de Saint-Omer-Eglise [Saint-Omer-Capelle] joingnant west à le westgracht, oest aux terres de Jehan Craynelt et zud aux terres des vesve et hoirs de feu Stas le Hoeren et nort à le terre Jehan le Hoelcop.

Item s’ensieut le déclaration de une partie des hommaiges et fiefs tenus de moy ad cause de mondit fief de Coulomby :

  1. Primes Thomas le Roy en tient ung fief contenant noef quartiers de terre ou environ situés audit pays de Langle dont il me doit chascun an une paire de wans de reconnoissance au jour Saint Jean-Baptiste.
  2. Item Jehan Ghys fils Baudin en tient ung fief de une mesure de terre.
  3. Item Jehan du Hil bouchier en tient ung fief de quatre mesures dont il me doit chascun an une paire de wans au jour Saint Jean-Baptiste.
  4. Item Willaume Guys en tient ung fief de deux lines de terre dont il me doit chascun an de recongnoissance audit jour Saint Jean-Baptiste dix sept deniers parisis.
  5. Item Franchois le Thop en tient ung fief contenant cinq mesures dont il me doit de recongnoissance chascun an audit jour Saint-Estene trois cappons.
  6. Item Peronne fille Jaque le Houthere en tient ung fief contenant six quartiers de terre.
  7. Item le heritier de seur Leurence Carneux ung fief de trois mesures de terre dont il m’est deu chascun an de recongnoissance audit jour Saint-Jean trente deux deniers parisis.
  8. Item en tient encore ung fief de une mesure et une line de terre dont me sont deus chascun an de reconnoissance deux paires de wans.
  9. Item Lauwere Breton ung fief de deux mesures de terre dont il me doit chascun an de recongnoissance audit terme Saint-Jean une paire de wans.
  10. Item Jehan Hoelcop ung fief de une mesure.
  11. Item Jaque le Raquere ung fief de deux mesures dont il me doit chascun an de recongnoissance au jour Saint-Estene une paire de cappons.
  12. Item Jehan Heblincq ung fief de deux mesures.
  13. Item Jehan Van Helsthoucq ung fief de quatre lines de terre dont il me doit une paire de une paire de wans de recongnoissance chascun an au jour Saint-Jean.
  14. Item Willaume Ghys en tient ung fief d’une line de terre.
  15. Item Jehan Hellecop ung fief d’une mesure lequel fief est scitué à une voie alant de laditte motte parmi ledit fief à l’église et doit estre ladite voie si grande que pour y passer une personne menant ung cheval en la main [1].
  16. Item Anthoine Goustene en tient deux fiefs : (i) l’un contenant cinq mesures et deux lines de terre dont il me doit chascun an au jour de la pentecouste une paire de wans ;
  17. (ii) et l’autre fief s’estend en une mesure dont il me doit chascun an de recongnoissance ung denier audit jour.
  18. Item Willaume Oudegheerste ung fief contenant trois mesures de terre.
  19. Item Loy Hacque ung fief de deux lines de terre dont il me doit par an de recongnoissance à le Saint-Martin une aulbe.
  20. Item monsr de Noyelle ung fief de six mesures de terre [2].
  21. Item Jacquemine le Visth ung fief de deux mesures de terre dont elle me doit chascun audit terme Saint-Jean quatre sols parisis.
  22. Item Jaque Bertrel ung fief de deux mesures de terre.
  23. Item Martin Humer ung fief de huit mesures de terre dont il me doit chascun an de recongnoissance vingt deux sols et trois deniers et trois poitmines parisis.
  24. Item Marguerite le Raquere ung fief de quatre mesures dont elle me doit de reconnoissance audit jour Saint-Jean chascun an une paire de wans.
  25. Item Pieter Vanelstbroucq ung fief de une mesure de terre ou environ, dont il me doit de recongnoissance ung cappon chascun an.
  26. Item Carle le Racquere ung fief de trois mesures.
  27. Item Jehan Vander Walle fils Jehan ung fief de cinq quartiers.

Item et se ay encores plusieurs aultres hommages et terres tant feodaux comme cottiers seans au terroir de Marcq qui m’appartiennent ad cause de mondit fief, desquels je ne puis et ne scay faire déclaration obstant que tout est occupé par les Anglois anchiens ennemis du Roy de France.

Néantmoins je proteste d’en faire  déclaration quant je porray pour y garder mon droit et le droit et auctorité de mes dits seigneurs, et avecq ce me doivent tous les dis hommes ad cause de leurs dis fiefs dessus nommés autre et par dessus les charges et recongnoissances que les aucuns diceulx doivent, dont dessus est faite mention relief toutes fois que le cas y eschiet tel que de valeur de leurs dis fiefs pour ung an à prendre en trois ans l’un, ne le pieur ne le meilleur, cambrelaige coustumier et le cinquiesme denier à le vente, don ou transport, et aussi service de plais en ma court toutesfois qu’ils y seront souffissamment adjournez, et aultres tels droits que on doit à mes pers et compaignons, ad cause de leurs fiefs qui sont semblables à mondit fief ;

Lequel mondit fief je tieng et adveue à tenir de mesdits seigneurs en ung fief par relief de la valleur d’icellui pour ung an, cambrelaige coustumier et en paiant le quint denier à le vente, don, ou transport, toutes fois que le cas y eschiet et seu doy service de plais en leur salle de la dite Eglise ou ailleurs là où il apparrendra avecq mes pers et compaignons toutesfois que je y serai souffissamment adjournez ou requis, et tous autres services que à tel fief appartient et comme doivent et sont tenus de faire mesdis pers et compaignons qui tiennent semblables fiefs, et baille cest mien présent rapport tout par amendement et par le protestation dessus dite ;

En tesmoing de ce jay mis mon scel à cest mien présent rapport fait et escript le dix septiesme jour de mars l’an mil quatre cens soixante six.

[1] Article 11 dans le dénombrement de 1520. Il appartient alors à Loys Steven.

[2] Article 1 dans le dénombrement de 1520. Il appartient alors à Mr de Noyelle.

Publicités

Dénombrement du fief de Colomby (1520)

Cartulaire de Saint-Bertin, volume 9, page 309 (Bibliothèque de Saint-Omer).

Le 7 novembre 1520.

C’est le rapport et dénombrement que Jacques Postel, mary et bail de Jossine de le Becque et par avant vesve de feu Josse de Beaurain et à ceste cause aiant le bail et gouvernement de Colenet de Beaurain, fils dudit feu Josse qu’il olt de ladite Jossine sa femme, d’un fief et noble tènement succédé et escheu audit Colenet par le trespas dudit feu Josse, son père, nommé le fief et seigneurie de Coulomby ;

Lequel fief ledit Colenet tient et adveue à tenir de mes très honorés seigneurs Mrs les Religieux, Abbé et couvent de l’église et abbaye de Saint-Bertin, et se comprend en ce qui s’ensuit, assavoir en sept mesures de terre sur lesquelles y a une motte et par ci-devant chasteau, plache et demeure et fossés à l’entour que l’on nomme Le Tour de Coulomby séant au pays de Langle en le paroisse de Sainte-Marie-Eglise [Sainte-Marie-Kerque] et avec ce a plusieurs hommes qui tiennent dudit Colenet leurs fiefs, et de la grandeur d’iceulx leurs fiefs sera cy après faite déclaration ;

Icelles sept mesures et motte ledit Colenet les tient en son domaine aboutant west à une rue nommée le West-grachy, oest aux terres de Mr de Noielle de l’abbaye de Watenes, devers nort à Loys Stevene et zud à Pierre Le Carpentier ;

S’enssieut la déclaration des hommes de fief qui tiennent leurs fiefs dudit Colenet en sa dite seigneurie de Coulomby  :

  1. Et primes Mr de Noielle tient ung fief contenant six mesures et demie gisant en la paroisse de Saint-Omer-Eglise [Saint-Omer-Capelle], aboutant zud à la rue et dreue du Watregandt, nort à le table des poures de la dite église, oest et west audit seigneur de Noielle, francq de recognoissance,
  2. Willame Bertele fils de Clay tient ung fief contenant cinq mesures ou environ en le paroisse de Saint-Omer-Eglise, aboutant vers oest à le Brouestraet, west à sire Jacques Ducrocq, zud et nort à le terre des Chartreux lez Saint-Omer, et doibt de recognoissance sur le jour Saint Martin diver [d’hiver] trois cappons.
  3. Item Paschine fille de feu Jehan Descamps tient ung fief contenant trois mesures ou environ gissant en le paroisse de Saint-Omer-Eglise, devers zud à une rue nommée Helebedje, oest et nort à le terre le sire Cornilles le Racquere, lequel fief doibt de recognoissance le jour Saint Jean-Baptiste une paire de wans de mouton.
  4. Item Jehan le Pappe à cause de sa femme tient ung fief contenant cinq mesures ou environ gisant en le paroisse de Saint-Folquin, aboutant nort à le Donckerstraet, zud à Jacques de Fontaines et west audit Jehan le Pape et en doibt de recognoissance sur le jour Saint Jean-Baptiste une paire de wans de mouton.
  5. Ledit Jehan le Pappe tient ung aultre fief contenant une mesure gisant en le paroisse de Saint-Folquin aboutant nort à le Donckerstraet, zud et west audit Jacques de Fontaines et oest audit Jehan le Pappe et doit de recognoissance audit jour Saint Jean-Baptiste ung denier parisis.
  6. Ledit Jehan le Pappe tient ung aultre fief contenant quatre mesures ou environ gisant en la dite paroisse de Saint-Folquin, aboutant zud au fief de Pierre de Pitgham, west à le terre de Guillaume Rogier, oest au fief dudit Pitgham, et nort à le terre de Martin Cadart, et doibt de recognoissance audit jour une paire de wans de mouton.
  7. Item Clay Gontrauwe tient ung fief d’une mesure en le paroisse de Sainte-Marie-Eglise, aboutant zud à Jacques de le Croix, oest à Clay Bercle, west audit Clay et nort à le vesve de Jacques Leleu et Jacques de le Croix, doibt de recognoissance sur le jour Saint Matin ung cappon.
  8. Item Willame Rogier tient ung fief contenant quatre lignes ou environ aboutant west à le gracht, zud à le terre Charles de le Haie et nort à Anthoine Deule à cause de sa femme, doibt de recognoissance sur le jour Saint Jean-Baptiste une paire de wans.
  9. Ledit Willame tient ung aultre fief contenant trois mesures ou environ aboutant zud et nort à Jehan le Heere, oest à le terre des enffans de Jehan le Racquere et west à Anthoine Deule et doibt de recognoissance sur ledit jour Saint Jean-Baptiste trente deux deniers parisis.
  10. Item Clay Leleu fils de Franche tient ung fief contenant deux mesures ou environ gisans en le paroisse de Saint-Folquin, zud et nort à le terre de Jehan le Heere, oest aux hoirs de Willame van Hulst, et west à Claude le Racquere, doibt de recognoissance sur le jour Saint Jean-Baptiste deux cappons.
  11. Item Loys Steven tient ung fief contenant une mesure en le paroisse de Saint-Omer-Eglise aboutant west à le rue de le gracht, zud au fief de Coulomby, nort à le terre de l’abbaye de Watenes, et oest audit fief de Coulomby, lequel fief est francq de recognoissance parmi ce qu’il doibt livrer ung chemin à ceulx de la maison dudit Coulomby pour aller à l’église de pied ou de cheval quand le cas y eschiet et à aultres non.
  12. Item Maroy Coelstocq tient ung fief contenant deux mesures ou environ gisant en le paroisse de Saint-Folquin devers zud à le rue de fuillaque, nort à Claude le Racquere, oest audit Maroy et west à Jehan Sandres, doibt de recognoissance sur le jour Saint Jean-Baptiste une paire de wans.
  13. Item Jehan Sauvaige tient ung fief contenant deux mesures en le paroisse de Saint-Folquin aboutant oest à le terre de l’église de Sangheem, west à Jehan de Vincq, nort à le gracht, zud à le vesve et hoirs de Valspect, doibt de recongnoissance sur le jour Saint Jean une lanche, ou quatre sols parisis pour ledite lanche.
  14. Item sire Jehan Pellart presbtre tient ung fief contenant deux lignes en le paroisse de Saint-Omer-Eglise, aboutant west à Mr de Noielle, oest aux hoirs de Jehan de Bleux, nort à le terre de Jehan le Heere, et zud à le terre de le vesve de feu Jehan Gheux, lequel fief doibt de recongnoissance sur le jour Saint Jean seize deniers obol parisis.
  15. Ledit sire Jehan Pellart tient ung aultre fief contenant une ligne en la paroisse de Saint-Omer-Eglise, aboutant oest à la rue de le Donckerstraet, zud Paschin le May, nort à Robert Gougibus à cause de sa femme, lequel fief est francq de recongnoissance.
  16. Item Simon Hollin à cause de sa femme tient ung fief contenant six quartiers ou environ en le paroisse de Saint-Omer-Eglise, zud à Jehan Clysoloryet, nort à Jehan de Balinghem à cause de sa femme et oest à Jehan Sandres, doibt de recongnoissance sur le jour Saint Jean-Baptiste une paire de wans.
  17. Item Jehan le Here à cause de sa femme tient ung fief contenant huit mesures ou environ en le paroisse de Saint-Omer-Eglise aboutant zud à une rue nommée le Couwet-straethe, west à le terre Martin Van Zuttre, nort à le terre Simon le Mesemacre, et oest à le terre Jehan Stocman à cause de sa femme, et doibt de recongnoissance sur le jour Saint Jean-Baptiste vingt deux sols trois deniers parisis demi poite et une paire de wans.
  18. Ledit Jehan de Here à cause de sa femme tient ung aultre fief contenant deux mesures unge ligne et vingt cincq vergues aboutant west aux hoirs de Jehan Picque, zud à le vesve de Jehan Hacque et nort à Robert Gougibus à cause de sa femme, doibt de recongnoissance audit jour Saint Jean une paire de wans.
  19. Item Jehan Enens tient ung fief contenant cincq quartrons de terre en la dite paroisse de Saint-Omer-Eglise aboutant nort à le rue nommée le Craspart, oest aux hoirs Jehan de Gyseleroy, zud à le terre de l’abbaye de Watenes et west au fief Thomas Romelle, lequel fief est francq de recongnoissance.
  20. Item Willame de Pitgham à cause de sa femme tient ung fief contenant six quartiers en la dite paroisse de Saint-Omer-Eglise, devers west aux hoirs de sire Guillaume de Lattre presbtre, oest à Jehan le Here, vers zud à Guilbert de Boullongne et nort à Robert Soudaen à cause de sa femme, francq de recongnoissance.
  21. Ledit Willame de Pitgham à cause de sa dite femme tient ung aultre fief en la dite paroisse contenant trois quartrons de terre, aboutant vers west au guesdyc, oest à Jehan le Pappe et nort à l’abbaye de Saint-Bertin et doibt de recongnoissance le jour Saint Martin d’iver une auwe.
  22. Item Jehan Stocmaen à cause de sa femme tient ung fief contenant une mesure en ladite paroisse de Saint-Omer-Eglise, aboutant devers oest à une rue nommée Donckerstraet, west Jehan le Here, zud les hoirs de Woultre Eurard et nort audit Jehan le Here, francq de recongnoissance.
  23. Item sire Cornilles le Racquere presbtre tient ung fief contenant trois mesures en ladite paroisse de Saint-Omer-Eglise, west Rudt Duguewet, oest à Jehan Sandres, zud audit sire Cornilles et nort audit Ruudt, francq de recongnoissance.
  24. Item Ruudt Duguewet tient ung fief contenant deux mesures et soixante vergues gisant en le dite paroisse de Saint-Omer-Eglise, aboutant west à le gracht et oest au Branmedyc, francq de recongnoissance.
  25. Item Pierre de Pitgham tient ung fief de quatre mesures ou environ gisant en le paroisse de Saint-Folquin, aboutant oest à le terre de Guillaume le Witd, nort au fief de Jehan le Pappe, doibt de recongnoissance le jour Saint Jean-Baptiste une paire de wans.
  26. Ledit Pierre de Pitgham tient ung aultre fief contenant six quartiers de terre en ladite paroisse de Saint-Folquin aboutant west du mollin, west à le terre des hoirs Jacques Leleu, zud à Jehan le Pappe, nort et oest audit Jehan le Pappe, francq de recongnoissance.
  27. Item Allard le Bindre à cause de sa femme tient ung fief contenant deux mesures en le paroisse de Sainte-Marie-Eglise, aboutant oest au grandt Watregandt, zud au fief de Jacques Leleu, west et nort à le terre Charles de le Haie, lequel fief est mains du seigneur par faulte de debvoirs non faits.
  28. Item Jehan (Wast) tient quatre mesures de fief ou environ gisant en le paroisse de Saint-Folquin aboutant devers zud et devers nort à le terre de Mrs de capitre de Therouenne, oest à le terre Willame Quequeleghe, et west à Robert de Wissoc, et doibt de recongnoissance chacun an au jour Saint Estene quatorze sols parisis.

Tous lesquels hommes de fief cy dessus sont tenus de paier chascun an leursdites recongnoissances aux jours que dessus sur ledit lieu et seigneurie de Coulomby à péril d’amende de dix sols parisis.

Item ay encores plusieurs aultres hommaiges feodaulx et cottiers tant au pays de Langle que en la terre de Marcq qui sont tenus dudit fief de Coulomby, dont promptement n’en sauroit en apparoir, dont la pluspart est tenu et occupé des Anglois.

Et proteste ledit Colenet en faire rapport et déclaration quand il porra pour y garder son droit, et le droit de mesdits seigneurs, et doibvent tous sesdits hommes à cause de leursdits fiefs par dessus les charges et recongnoissances que les aucuns d’iceulx doibvent comme dit est, relief, toutes fois que le cas y eschiet, tel que de la valeur de leurs dits fiefs pour ung an à prendre en trois ans l’un, ne le pieur ne le meilleur, cambellaige coustumier, et le cincquiesme denier à la vente, don ou transport, service de plais en sa court toutes fois qu’ils y sont requis ou adjournés souffisanment, et aultres tels debvoirs comme on doibt à ses pers et compaignons à cause de leursdits fiefs qui sont semblables au fief dudit fief de Coulomby.

Lequel fief de Coulomby ledit Colenet tient et adveue à tenir desdits seigneurs de Saint-Bertin en ung seul fief par relief de le valeur d’icellui pour ung an, cambellaige coustumier et le cincquiesme denier à le vente, don ou transport toutes fois que le cas y eschiet, service de plais en la salle de la dite abbaye de Saint-Bertin ou ailleurs là où il appartiendra avec ses pers et compaignons toutes fois qu’il y sera souffisanment sommé, requis ou adjourné et tous aultres services que à tel fief appartient et comme doibvent et sont tenus de faire ses pers et compaignons tenant semblables fiefs, et baille cest présent rapport icellui Jacques [Postel] oudit nom tout par amendement et par le protestation avant dite.

En tesmoing de ce ledit Jacques Postel oudit nom a mis son scel audit rapport par emprunt le septiesme jour de novembre, anno mil cincq cens et vingt.